archeology

To i tolle Sulawesi mi Indonesia, mi felko *vanwienduri utúlier i tulumaite i anyára *tekemmaron apantaila kelva ná. I tekemma tekina karne vaxenen ar apanta polda polka arwa tumpo atta to kaserya i ké karkat nát. Or i polka eke mon kene *márunyat, ar lanna to i ramba ambe polkato *tekemmato*lemmar, nainalima amna queline tensi. I tekemmaron *fintale tea i karindo arimaite né. I vanwienduri navir i polkar tekine koranari *tuxainen *kanaquain lempe yá.

Ilúvea *laukatáre umbe ná ya voro lihlikka kata i silúmea umbe *iluhímeo. Mal yú urre tulmar ké kolir *lahoraine *tyardar: yalle helke *tique ar *nanya *laukatárenen apanta ké engwi i kuvine nér nu sa. *Fornóresse, ara i osto Lendbreen, tára oron ya tensi tupina helkenen, mal sí i *tiquila helke *nanhalyane nulla nakka, ar *sasse tamnar hehtaine liénen i neldea hya kantea haranyesse. *Silu i harma lá malta, míri, hya mainar, mal ilaurie *yuhtamnar ve hyapati, pilini, *lossepanor, ente lanni *vortaine nixenen.